43. باب رەسۇلۇللاھنىڭ ئائىلە-تاۋابىئاتلىرىنى ھۆرمەتلەش ۋە ئۇلارنىڭ پەزىلىتىنىڭ بايانى

346. يەزىد ئىبن ھەييان رەزىيەللاھۇ ئەنھۇدىن رىۋايەت قىلىنىدۇكى، مەن ۋە ھۇسەين ئىبن سەبرە ۋە ئەمر ئىبن مۇسلىم بىلەن بىرلىكتە زەيد ئىبن ئەرقەمنىڭكىگە باردۇق (ئاللاھ تائالا ئۇلاردىن رازى بولسۇن)، بىز ئۇنىڭ قېشىدا ئولتۇرغان ۋاقىتتا ئۇنىڭغا ھۇسەين: « ئى زەيد! رەسۇلۇللاھنى كۆردۈڭ، ھەدىسلىرىنىمۇ ئاڭلىدىڭ، رەسۇلۇللاھ بىلەن ئۇرۇشتا بىللە بولدۇڭ، ئۇنىڭ كەينىدە ناماز ئوقۇدۇڭ، ھەقىقەتەن سەن كۆپ ياخشىلىقلارنى بېشىڭدىن كەچۈردىڭ، سەن رەسۇلۇللاھتىن ئاڭلىغانلىرىڭنى سۆزلەپ بەرگىن » ، دېدى. ئۇ: « ئى قېرىندىشىمنىڭ ئوغلى! ئاللاھ تائالا بىلەن قەسەمكى، ھەقىقەتەن مەن ياشىنىپ قالدىم، ئۇ ئىشلارغا ئۇزۇن زامان بولۇپ كەتتى. مەن رەسۇلۇللاھتىن ئاڭلىغان نەرسىلىرىمنىڭ بەزىسىنى ئۇنتۇپ كەتتىم، سىلەرگە سۆزلەپ بەرگەنلىرىمنى قوبۇل قىلىڭلار، سۆزلەپ بەرمىگەنلىرىمگە مېنى تەكلىپ قىلماڭلار » ، دېدى. ئاندىن مۇنداق دېدى: « رەسۇلۇللاھ مەككە بىلەن مەدىنە ئارىسىدىكى خۇمما دەپ ئاتىلىدىغان سۇ بويىدا سۆز قىلىپ، ئاللاھ تائالاغا ھەمدۇسانا ئېيتتى ۋە ۋەز-نەسىھەت قىلدى. « أَمَّا بعْدُ: أَلا أَيُّهَا النَّاسُ، فَإِنَّمَا أَنَا بَشَرٌ يُوشِكُ أَنْ يَأْتِيَ رسولُ ربي فَأُجيبَ، وأَنَا تَارِكٌ فِيكُمْ ثَقَلَيْنِ: أَوَّلهُما كِتابُ اللَّهِ، فِيهِ الهُدى وَالنُّورُ، فَخُذُوا بِكِتابِ اللَّه، وَاسْتَمْسِكُوا به » « مەقسەتكە كەلسەك: ئى خالايىق! ئاگاھ بولۇڭلار، ھەقىقەتەن مەنمۇ بىر ئىنسان، پات يېقىندا رەببىم ئەۋەتكەن ئۆلۈم پەرىشتىسى كەلسە، ئۇنىڭغا جان تەسلىم قىلىمەن، مەن سىلەرگە ئىككى نەرسىنى قويۇپ كېتىمەن، ئۇلارنىڭ بىرسى ئاللاھ تائالانىڭ كىتابىدۇر، ئۇ ھىدايەت ۋە نۇردۇر. ئاللاھ تائالانىڭ كىتابىنى مەھكەم تۇتۇڭلار ۋە ئۇنىڭغا چىڭ ئېسىلىڭلار! » ، دېدى ۋە بىزنى ئاللاھ تائالانىڭ كىتابىغا قىزىقتۇردى، رىغبەتلەندۈردى. ئاندىن: « وأَهْلُ بَيْتِي، أُذكِّركم اللَّه في أهلِ بيْتي، أذكِّرُكم اللَّه في أهل بيتي » « مەن سىلەرگە ئائىلە-تاۋاباتىم ھەققىدە ئاللاھ تائالانى يادىڭلارغا سالىمەن » ، دېدى. ئاندىن ئۇنىڭغا ھۇسەين: « ئى زەيد! رەسۇلۇللاھنىڭ ئائىلە-تاۋاباتى كىم؟ رەسۇلۇللاھنىڭ ئائىلە-تاۋاباتى ئۇنىڭ ئاياللىرى ئەمەسمۇ؟»، دېدى. زەيد: « رەسۇلۇللاھنىڭ ئاياللىرى رەسۇلۇللاھنىڭ ئائىلە-تاۋاباتىغا كىرىدۇ، لېكىن، رەسۇلۇللاھنىڭ بۇ يەردە دېمەكچى بولغىنى سەدىقە ھارام قىلىنغان كىشىلەردۇر » ، دېدى. ھۇسەين: « ئۇلار كىم؟»، دېدى. زەيد: « ئۇلار ئەلىنىڭ ئائىلىسى، ئەقىيلنىڭ ئائىلسى، جەئفەرنىڭ ئائىلىسى ۋە ئابباسنىڭ ئائىلىسى » ، دېدى. ھۇسەين: « ئۇلارنىڭ ھەممىسىگە سەدىقە ھاراممۇ؟»، دېدى. زەيد: « شۇنداق، ئۇلارنىڭ ھەممىسىگە سەدىقە ھارام » ، دېدى. ― مۇسلىم رىۋايەت قىلغان.

347. ئىبن ئۇمەر رەزىيەللاھۇ ئەنھۇدىن رىۋايەت قىلىنىدۇكى، ئەبۇ بەكرى سىددىق رەزىيەللاھۇ ئەنھۇ مۇنداق دېگەن: « ارْقُبُوا مُحَمَّداً صَلّى اللهُ عَلَيْهِ وسَلَّم في أَهْلِ بيْتِهِ » « پەيغەمبەر ئەلەيھىسسالامنى ئۇنىڭ ئائىلە-تاۋاباتلىرىنى ھۆرمەتلەش بىلەن ھۆرمەتلەڭلار » . ― بۇخارى رىۋايەت قىلغان.