ئى مۆمىنلەر! ماللىرىڭلار ۋە بالىلىرىڭلار سىلەرنى ئاللاھنىڭ زىكرىدىن (يەنى ئاللاھنىڭ تائەت ـ ئىبادىتىدىن) غەپلەتتە قالدۇرمىسۇن، كىملەركى شۇنداق قىلىدىكەن، ئۇلار زىيان تارتقۇچىلاردۇر. [63-سۈرە مۇنافىقۇن، 9-ئايەت]

ئەبۇ ھۇرەيرە رەزىيەللاھۇ ئەنھۇ رىۋايەت قىلىپ مۇنداق دەيدۇ: رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: «كىمكى ھازا ئۈستىدە ھازىر بولۇپ، ئاندىن جىنازا نامىزىغا داخىل بولسا، ئۇنىڭغا بىر قىيرات ساۋاب بولىدۇ. كىمكى جىنازا نامىزىغا داخىل بولۇپ، دەپنە قىلىشقىمۇ قاتناشقان بولسا، ئۇ ئادەمگە ئىككى قىيرات ساۋاب بولىدۇ». «ئىككى قىيرات دېگەن قانچىلىك كېلىدۇ؟» دەپ سورالغاندا، رەسۇلۇللاھ: «ئىككى چوڭ تاغدەك كېلىدۇ» دەپ جاۋاب بەرگەن.(بۇخارىي، 1325 – ھەدىس، جەنائىز، 58؛ مۇسلىم، 2189 – ھەدىس، جەنائىز، 52.)

سوئال: گۈزەل ئەخلاقلىق بىر مۇسۇلمان نېمىلەرنى قىلمايدۇ؟

جاۋاب: گۈزەل ئەخلاقلىق بىر مۇسۇلمان تۆۋەندىكىلەرنى قىلمايدۇ:

(1) ئىسلام ئېتىقادىغا زىت كېلىدىغان پىكىر – ئېقىملارنى قوبۇل قىلمايدۇ.

(2) ئىسلامدا بۇيرۇلغان ئەمەل – ئىبادەتلەرنى تەرك ئەتمەيدۇ، گۇناھ – مەسىيەت ئىشلىمەيدۇ.

(3) جەمئىيەتتىكى ئەخلاقسىز كىشىلەرگە ئەگەشمەيدۇ، ئۇلارغا نەسىھەت قىلىشنىمۇ ئونۇتمايدۇ.

(4) يالغان سۆزلىمەيدۇ، ساختىپەزلىك قىلمايدۇ، غەيۋەت قىلمايدۇ، تۆھمەت قىلمايدۇ.

(5) ھاراق ئىچمەيدۇ، تاماكا چەكمەيدۇ، ئۆسۈم بىلەن مۇئامىلە قىلمايدۇ، بىراۋنىڭ ھەققىنى يېمەيدۇ.

(6) بىراۋغا ئۆچمەنلىك، دۈشمەنلىك، كۆرەلمەسلىك قىلمايدۇ، كىشىلەرنى مەسخىرە قىلمايدۇ.

(7) ئاتا – ئانىسىنى قاخشاتمايدۇ، ئائىلىسىدىكىلەرگە قاتتىق قول بولمايدۇ.

(8) ھورۇن، تىرىكتاب، بېخىل، نامەرد، ئۇياتسىز بولمايدۇ، تۇزكور بولمايدۇ.

(9) پۇرسەتپەرەس، ھېيلىگەر، ئالدامچى، ئوتقۇيرۇق، چېقىمچى بولمايدۇ.

(10) ۋەتىنىگە، خەلقىگە ۋە قەۋم قېرىنداشلىرىغا خىيانەت قىلمايدۇ.

ئى ئاللاھ ! سەن مېنىڭ پەرۋەردىگارىمسەن، سەندىن باشقا ھېچ ئىلاھ يوقتۇر، ساڭا تەۋەككۈل قىلدىم، سەن ئۇلۇغ ئەرشنىڭ ئىگىسىسەن، ئاللاھ خالىغان نەرسە بولىدۇ. خالىمىغان نەرسە بولمايدۇ. ئۇلۇغ، ئەڭ ئالىي ئاللاھنىڭ ياردىمى ۋە مەدىتى بولمىسا ھېچبىىر ئىشنى باشقا ئېلىپ چىقالمايمىز. بىلىمەنكى، ئاللاھ ھەممە نەرسىگە قادىردۇر، ئاللاھ ھەممە نەرسىنى تولۇق بىلىپ تۇرغۇچىدۇر. ئى ئاللاھ ! ساڭا سېغىنىپ نەپسىمنىڭ شەررىدىن، سېنىڭ ئىگىدارچىلىقڭدىكى ھەر بىر جاندارنىڭ شەررىدىن پاناھ تىلەيمەن. شۈبھىسىزكى مېنىڭ پەرۋەردىگارىم توغرا يولدىدۇر. (پەيغەمبەر ئەلەيھىسسالام « كىمكى بۇ دۇئانى ئەتىگەندە، ئاخشامدا ئوقۇيدىكەن، ئۇنىڭ ئۆزى، ئەھلى – ئەۋلادى ۋە مال – مۈلكى بىرەر كۆڭۈلسىزلىككە ئۇچرىمايدۇ» دېگەن).