156. باب جىنازا نامىزىنى ئوقۇغۇچى ئادەملەرنىڭ كۆپ بولۇشىنىڭ ۋە سەپـنىڭ ئۈچ ياكى ئۈچتىنمۇ كۆپ بولۇشىنىڭ ياخشى ئىكەنلىكى توغرىسىدا

932. ئائىشە رەزىيەللاھۇ ئەنھادىن رىۋايەت قىلىنىدۇكى، پەيغەمبەر ئەلەيھىسسالام مۇنداق دېگەن: « ما مِنْ ميِّتٍ يُصلِّي عليهِ أُمَّةٌ مِنَ المُسْلِمِينَ يبلُغُونَ مئَة كُلُّهُم يشْفَعُونَ له إِلا شُفِّعُوا فيه » « مۇسۇلمانلار جامائەسىدىن يۈز ئادەم بىرەر مىيىتنىڭ نامىزىنى چۈشۈرسە، ھەممىسى ئۇ مىيىت ئۈچۈن شاپائەت تىلىسە، ئۇلارنىڭ شاپائىتى قوبۇل قىلىنىدۇ » . ― مۇسلىم رىۋايەت قىلغان.

933. ئىبن ئابباس رەزىيەللاھۇ ئەنھۇدىن رىۋايەت قىلىنىدۇكى، مەن پەيغەمبەر ئەلەيھىسسالامنىڭ مۇنداق دېگەنلىكىنى ئاڭلىغان: « مَا مِنْ رَجُلٍ مُسْلمٍ يَمُوتُ، فَيقومُ عَلَى جَنَازتِهِ أَرْبَعونَ رَجُلا لا يُشركُونَ باللَّه شَيئاً إِلاَّ شَفَّعَهُمْ اللَّهُ فيهِ » « بىرەر مۇسۇلمان ئادەم ۋاپات بولۇپ، ئۇنىڭ جىنازىسىغا ئاللاھقا ھېچ نەرسىنى شېرىك كەلتۈرمەيدىغان 40 كىشى قاتناشسا، ئاللاھ تائالا ئۇلارنىڭ شۇ مىيىت ھەققىدىكى شاپائىتىنى قوبۇل قىلماي قالمايدۇ » .

934. مەرسەت رەزىيەللاھۇ ئەنھۇدىن رىۋايەت قىلىنىدۇكى، مالىك ئىبن ئۇبەيدە رەزىيەللاھۇ ئەنھۇ بىرەر جىنازا نامىزىنى ئوقۇش توغرا كەلگەندە، جامائەتنى ئاز كۆرۈپ قالسا، ئۇلارنى ئۈچ سەپكە بۆلۈپ تۇرغۇزاتتى. ئاندىن رەسۇلۇللاھ مۇنداق دېگەن، دەيتتى: « مَنْ صَلَّى عليهِ ثَلاثَةُ صُفُوف، فَقَدْ أَوْجَبَ » « قانداق بىر كىشىگە ئۈچ سەپ مۇسۇلمان ناماز چۈشۈرسە، ئۇنىڭغا جەننەت تېگىشلىك بولىدۇ » .