163. باب مىيىتنىڭ ياخشى گېپىنى قىلىش توغرىسىدا

950. ئەنەس رەزىيەللاھۇ ئەنھۇدىن رىۋايەت قىلىنىدۇكى، كىشىلەرنىڭ ئالدىدىن بىر جىنازا ئۆتكەنىدى. كىشىلەر ئۇنىڭ ياخشى گېپىنى قىلدى. پەيغەمبەر ئەلەيھىسسالام: « وَجَبَتْ » « تېگىشلىك بولدى » ، دېدى. ئاندىن كېيىن يەنە بىر جىنازا ئۆتتى. كىشىلەر ئۇنىڭ يامان گېپىنى قىلدى. پەيغەمبەر ئەلەيھىسسالام: « وَجبَتْ » « تېگىشلىك بولدى » ، دېدى. ئۇمەر ئىبن خەتتاب رەزىيەللاھ ئەنھۇ: « نېمە تېگىشلىك بولدى؟»، دەپ سورىغانىدى، پەيغەمبەر ئەلەيھىسسالام: « هذا أَثنَيتُمْ علَيْهِ خَيراً، فَوَجبتْ لَهُ الجنَّةُ، وهذا أَثنَيتُم عليه شرّاً، فَوَجبتْ لَهُ النًَّارُ، أنتُم شُهَداءُ اللَّهِ في الأرضِ » « بىرىنچى جىنازىنىڭ ياخشى گېپىنى قىلغانىدىڭلار، ئۇنىڭغا جەننەت تېگىشلىك بولدى. ئىككىنچى جىنازىنىڭ يامان گېپىنى قىلغانىدىڭلار، ئۇنىڭغا دوزاخ تېگىشلىك بولدى. سىلەر ئاللاھ تائالانىڭ زېمىندىكى گۇۋاھچىلىرى » ، دېدى. ― بۇخارى ۋە مۇسلىم رىۋايەت قىلغان.

951. ئەبۇ ئەسۋەد رەزىيەللاھۇ ئەنھۇدىن رىۋايەت قىلىنىدۇكى، مەن مەدىنىگە كېلىپ، ئۇمەر ئىبن خەتتاب رەزىيەللاھۇ ئەنھۇنىڭ يېنىدا ئولتۇرغانىدىم. بىر جىنازا قېشىمىزدىن ئۆتتى. كىشىلەر ئۇنىڭ ياخشى گېپىنى قىلغانىدى. ئۇ: « تېگىشلىك بولدى » ، دېدى. ئاندىن يەنە بىر جىنازا ئۆتۈپ كىشىلەر ئۇنىڭ ياخشى گېپىنى قىلغانىدى، ھەزرىتى ئۇمەر: « تېگىشلىك بولدى » ، دېدى. ئاندىن ئۈچىنچى جىنازا ئۆتۈپ كىشىلەر ئۇنىڭ يامان گېپىنى قىلغانىدى، ھەزرىتى ئۇمەر: « تېگىشلىك بولدى » ، دېدى. مەن: « نېمە تېگىشلىك بولدى؟ ئى مۇئمىنلەرنىڭ خەلىفىسى » ، دەپ سورىدىم. ھەزرىتى ئۇمەر: « مەن پەيغەمبەر ئەلەيھىسسالام دېگەن سۆزنى دېدىم. ئۇ مۇنداق دېگەن: « أَيُّمَا مُسلِم شَهِدَ لهُ أَربعةٌ بِخَير، أَدخَلَهُ اللَّه الجنَّةَ » ‹قايسى بىر مۇسۇلماننى تۆت نەپەر مۇسۇلمان كىشى ياخشى دەپ گۇۋاھلىق بەرسە، ئاللاھ تائالا ئۇنى جەننەتكە داخىل قىلىدۇ›، دېدى. بىز: ‹ئۈچ ئادەم بولسىچۇ؟›، دەپ سورىساق، رەسۇلۇللاھ: « وثَلاثَةٌ » ‹ئۈچ ئادەم بولسىمۇ بولىدۇ›، دېدى. بىز: ‹ئىككى ئادەم بولسىچۇ؟›، دەپ سورىۋىدۇق، رەسۇلۇللاھ: « وَإِثْنَانِ » ‹ئىككى ئادەم بولسىمۇ بولىدۇ›، دەپ جاۋاب بەردى. بىز: ‹بىر ئادەم بولسىچۇ؟›، دەپ سورىمىدۇق » . ― بۇخارى رىۋايەت قىلغان.