164. باب كىچىك بالىلىرى ئۆلۈپ كەتكەن ئادەمنىڭ ئېرىشىدىغان پەزىلىتى توغرىسىدا

952. ئەنەس رەزىيەللاھۇ ئەنھۇدىن رىۋايەت قىلىنىدۇكى، پەيغەمبەر ئەلەيھىسسالام مۇنداق دېگەن: « مَا مِنْ مُسلِمٍ يَمُوتُ له ثلاثَةٌ لم يَبلُغُوا الحِنْثَ إلا أدخلَهُ اللَّه الجنَّةَ بِفَضْل رحْمَتِهِ إيَّاهُمْ » « بىرەر مۇسۇلمان ئادەمنىڭ بالاغەتكە يەتمىگەن ئۈچ سەغىرە بالىسى ئۆلۈپ كەتسە، ئاللاھ تائالا ئۇلارغا رەھمەت قىلىش يۈزىسىدىن ئۇ ئادەمنىمۇ جەننەتكە كىرگۈزىدۇ » .

953. ئەبۇ ھۇرەيرە رەزىيەللاھۇ ئەنھۇدىن رىۋايەت قىلىنىدۇكى، پەيغەمبەر ئەلەيھىسسالام مۇنداق دېگەن: « لا يَمُوتُ لأِحَدٍ مِنَ المُسْلِمِينَ ثَلاثةٌ مِنَ الوَلَدِ لا تمَسُّهُ النَّارُ إِلاَّ تَحِلَّةَ القَسَم » « قايسى بىر مۇسۇلماننىڭ ئۈچ بالىسى ئۆلۈپ كەتسە، ئۇ دوزاختا كۆيمەيدۇ (جەھەننەمنىڭ ئۈستىگە سېلىنغان كۆۋرۈكتىن ئۆتۈش يۈزىسىدىن دوزاخقا بىر نۆۋەت يېقىنلىشىشنى ھېسابقا ئالمىغاندا). پەقەت ئاللاھ تائالانىڭ سۈرە مەريەم 71- ئايەتتە: ﴿وَإِن مِّنكُمْ إِلَّا وَارِدُهَا﴾ سىلەرنىڭ ئىچىڭلاردىن دوزاخقا بارمايدىغان بىرەر كىشىمۇ قالمايدۇ ، دېگەن قەسىمىنىڭ مۇقەررەرلىكى نۇقتىسىدىنلا دوزاختىن ئۆتىدۇ » .

954. ئەبۇ سەئىد خۇدرىي رەزىيەللاھۇ ئەنھۇدىن رىۋايەت قىلىنىدۇكى، پەيغەمبەر ئەلەيھىسسالامنىڭ ئالدىغا بىر ئايال كېلىپ: « ئى رەسۇلۇللاھ، سېنىڭ سۆزلىرىڭنى ئەرلەرلا ئاڭلاۋاتىدۇ. بىزگىمۇ ئىختىيارىڭ بويىچە بىر كۈننى بەلگىلەپ بەرسەڭ، شۇ كۈندە يىغىلساق، بىزگە ئاللاھ تائالا ساڭا بىلدۈرگەن دىنىي ئەھكاملارنى ئۆگەتسەڭ » ، دېدى. پەيغەمبەر ئەلەيھىسسالام ئۇلارغا: « اجْتَمِعْنَ يَوْمَ كَذَا وَكَذَا » « پالانى كۈندە پالانى جايغا يىغىلىڭلار » ، دېدى. ئۇلار يىغىلدى. پەيغەمبەر ئەلەيھىسسالام ئۇلارغا دىنىي ئەھكاملارنى تەلىم بەردى. ئاندىن ئۇلارغا: « ما مِنْكُنَّ مِن امْرَأَةٍ تُقَدِّمُ ثَلاثةً منَ الوَلَدِ إِلاَّ كانُوا لهَا حِجَاباً منَ النَّار » « سىلەردىن بىرەر ئايالنىڭ ئۆزىدىن ئىلگىرى ئۈچ بالىسى ئۆلگەن بولسا، ئۇ ئۇنىڭغا دوزاختىن پەردە بولىدۇ » ، دېدى. توپلانغان ئاياللاردىن بىرى: « ئى رەسۇلۇللاھ! ئالدىن ئۆلگەن بالىسى ئىككى بولسىچۇ؟»، دەپ سورىدى. پەيغەمبەر ئەلەيھىسسالام: « وَاثْنَيْن » « ئىككى بولسىمۇ شۇنداق بولىدۇ » ، دېدى. ― بۇخارى ۋە مۇسلىم رىۋايەت قىلغان.