176. باب مۇساپىر ئادەمنىڭ ئۆز ئۆيىگە كۈندۈزى قايتىپ كېلىشنىڭ ياخشى ئىكەنلىكى، زۆرۈر بولمىسا كېچىسى قايتىپ كېلىشنىڭ ياخشى ئەمەسلىكى توغرىسىدا
985. جابىر رەزىيەللاھۇ ئەنھۇدىن رىۋايەت قىلىنىدۇكى، پەيغەمبەر ئەلەيھىسسالام مۇنداق دېگەن: « إذا أَطالَ أَحدُكمْ الغَيْبةَ فَلا يطْرُقنَّ أَهْلَهُ لَيْلاً » « بىرىڭلار ئائىلىسىدىن ئايرىلغىلى ئۇزاق بولغان بولسا، قايتىپ كەلگەندە ئائىلىسىگە كېچىسى كىرمىسۇن » .
يەنە بىر رىۋايەتتە: پەيغەمبەر ئەلەيھىسسالام سەپەردىن كەلگەن كىشىنىڭ ئۆز ئۆيىگە كېچىسى كىرىشنى مەنئى قىلغان، دېيىلگەن. ― بۇخارى ۋە مۇسلىم رىۋايەت قىلغان.
986. ئەنەس رەزىيەللاھۇ ئەنھۇدىن رىۋايەت قىلىنىدۇكى، پەيغەمبەر ئەلەيھىسسالام سەپەردىن قايتقاندا ئۆيىگە كېچىسى كىرمەيتتى. ئەتىگەن ياكى كەچقۇرۇندا كىرەتتى.
― بۇخارى ۋە مۇسلىم رىۋايەت قىلغان.
ھەدىسنىڭ مۇھىم نۇقتىلىرى: 1) سەپەردىن قايتقاندا بالا-چاقىلىرىنى چۆچۈتۈپ قويماسلىقى ۋە ياقتۇرمايدىغان ئىشلارنى كۆرۈپ قالماسلىقى ئۈچۈن كېچىدە ئەمەس، بەلكى ئەتىگەن ياكى كەچ تەرەپتە كېلىشنىڭ ياخشى ئىكەنلىكى.
2) ئەگەر بالا-چاقىلىرى ئۇنىڭ كېلىشىنى بىلسە ياكى كېچىدە كەلمىسە بولمايدىغان زۆرۈرىيەت بولسا كېچىدە كەلسىمۇ بولىدىغانلىقى.
